კობა ლურსმანაშვილი: „ხარაგაულის მუნიციპალიტეტმა რეგიონული განვითარების ფონდიდან მაქსიმალური დაფინანსება მიიღო“

25 იანვარს საქართველოს რეგიონული განვითარებისა და ინფრასტრუქტურის სამინისტროში რეგიონული განვითარების სამთავრობო კომისიის სხდომა გაიმართა. სხდომაზე ხარაგაულში 2016 წელს განსახორციელებელი ინფრასტრუქტურული პროექტების დაფინანსების საკითხი იმერეთის მხარის რწმუნებულმა-გუბერნატორმა, გივი ჭიჭინაძემ, ხარაგაულის მაჟორიტარმა დეპუტატმა, ნოდარ ებანოიძემ და ხარაგაულის მუნიციპალიტეტის გამგებელმა, კობა ლურსმანაშვილმა ერთობლივად განიხილეს. კომისიის სხდომას მინისტრის მოადგილე თენგიზ შერგელაშვილი უძღვებოდა.
როგორც ჩვენთან საუბარში ხარაგაულის მუნიციპალიტეტის გამგებელი კობა ლურსმანაშვილი განმარტავს, რეგიონული განვითარების ფონდიდან, ხარაგაულში 2016 წელს განსახორციელებელი მასშტაბური ინფრასტრუქტურული პროექტების დაფინანსება ორ ეტაპად განიხილებოდა. ,,პირველ ეტაპზე ხარაგაულისთვის 1 500 000 ლარი გამოიყო, ხოლო მეორე ეტაპზე 1 000 000 ლარი. ზემოთ ჩამოთვლილ პროექტებში არ არის ზვარის ახალგაზრდული ბანაკი. პროექტით სახელმწიფო დაინტერესდა და მისი სარეაბილიტაციო სამუშაოების დაფინანსება ამ ეტაპზე, სამომავლო განხილვას ელოდება. აღსანიშნავია, რომ პროექტების წარდგენაზე ერთობლივად ვმუშაობდით, როგორც გამგეობის გუნდი, ასევე მაჟორიტარი დეპუტატი ნოდარ ებანოიძე და იმერეთის სამხარეო ადმინისტრაცია. ჩემსა და მაჟორიტარ დეპუტატს შორის იყო განსხვავებული პოზიციები გარკვეული პროექტების დაფინანსებასთან დაკავშირებით, მაგრამ მოსახლეობისა და ადგილზე არსებული ინტერესებიდან გამომდინარე, ჩვენ ერთმანეთში შევჯერდით. მთავარია, რომ ჩვენი პოზიციები პროექტების განხორციელებასთან დაკავშირებით თანხვედრილია. ვფიქრობ, კარგად ვიმუშავეთ, ხალხის ინტერესებზე გათვლილი პროექტები მივიტანეთ სამინისტროში, მათი ხედვებიც დაემთხვა ჩვენსას და სწორედ ამიტომ მივიღეთ მაქსიმალური დაფინანსება“.
ხარაგაულის მუნიციპალიტეტის გამგებლის, კობა ლურსმანაშვილის ინფორმაციით, 2016 წელს რეგიონალური განვითარების ფონდიდან შემდეგი პროექტები დაფინანსდა:

უბისა-ღორეშის საავტომობილო გზის, დაახლოებით 5კილომეტრიანი მონაკვეთის, მოასფალტების პროექტი, თანხით 1 მილიონ 199 767 ლარი;

ხარაგაულის მუნიციპალიტეტის დაბის N2 საბავშვო ბაღის რეაბილიტაცია. პროექტის ღირებულება 139 251 ლარი;

ხარაგაულის მუნიციპალიტეტის სოფელ ხევის საბავშვო ბაღის რეაბილიტაციის პროექტი - 88 710 ლარის ფარგლებში;

ღორეშის, წიფისა და მოლითის საბავშვო ბაღების რეაბილიტაციის პროექტი საერთო ღირებულებით - 165 438 ლარი;

გზის დამცავი კედლების მოწყობა დაბა ხარაგაულში, საღანძილისა და ლეღვნის ადმინისტრაციულ ერთეულებში. პროექტის ჯამური ღირებულება არის 108 727 ლარი;

სოფელ გედსამანიის ცენტრალური გზის რეაბილიტაცი, თანხით 499 327 ლარი;

ხარაგაული-ბაზალეთის გზის დარჩენილი ნაწილის რეაბილიტაცია (ბაზალეთის ადმინისტრაციული ცენტრიდან სოფელ ქროლის გადასახვევამდე). პროექტის ღირებულება 287 811 ლარია.