„ადრეული და სკოლამდელი აღზრდისა და განათლების შესახებ საქართველოს კანონის პროექტის“ საჯარო განხილვა სამტრედიის მუნიციპალიტეტში მოეწყო

18 თებერვალს „ადრეული და სკოლამდელი აღზრდისა და განათლების შესახებ საქართველოს კანონის პროექტის“ საჯარო განხილვა, იმერეთის რეგიონისთვის, სამტრედიის კულტურის ცენტრში მოეწყო.
კანონპროექტის პრეზენტაცია, სამტრედიის კულტურის ცენტრში, ავტორებმა, პარლამენტის წევრებმა – ეკა ბესელიამ, გედევან ფოფხაძემ და ოთარ ჩრდილელმა წარმოადგინეს.
ღონისძიებას, ხარაგაულის მუნიციპალიტეტის გამგებელი კობა ლურსმანაშვილი, სკოლამდელ დაწესებულებათა გაერთიანების დირექტორი, ირმა სებისკვერაძე და ხარაგაულის მუნიციპალიტეტის 14-ივე საბავშვო ბაღის გამგე ესწრებოდა.
პროექტის პრეზენტაციის შემდეგ დისკუსია გაიმართა, რომელშიც აღნიშნული სფეროს წარმომადგენლებმა თავიანთი რეკომენდაციები და შენიშვნები წარმოადგინეს.
ხარაგაულის მუნიციპალიტეტის გამგებელმა, კობა ლურსმანაშვილმა მადლობა გადაუხადა კანონპროექტის ავტორებს და მათ, სკოლამდელი ასაკის ბავშვთა ტრანსპორტირების საკითხზე რეკომენდაცია წარუდგინა.
ახალი კანონპროექტის მნიშვნელობაზე ისაუბრა, ავტორმა და პარლამენტის წევრმა ეკა ბესელიამ: „ეს არის უმნიშვნელოვანესი რეფორმა, რომელიც ორი წელია მზადდება „საქართველოს პარლამენტის ადამიანთა უფლებების დაცვისა და სამოქალაქო ინტეგრაციის კომიტეტის“ და გაეროს ბავშვთა ფონდის (იუნისეფის) მიერ. პროექტი მიზნად ისახავს უფასო, ერთიან სკოლამდელ განათლებას ყველა ბავშვისთვის. მასში არაერთი სიახლეა თავმოყრილი, მათ შორის ეროვნული სტანდარტების დანერგვა მთელი ქვეყნის მასშტაბით და მონიტორინგის მექანიზმების გაძლიერება იმისთვის, რომ თითოეული ბავშვი უზრუნველყოფილი იყოს საქართველოში ინკლუზური და ხარისხიანი განათლებით“ - განმარტა ეკა ბესელიამ.
მნიშვნელოვანია, ასევე, რომ ახალი კანონპროექტით საბავშვო ბაღის აღმზრდელებს მიენიჭებათ პედაგოგის სტატუსი. ყურადღება მიექცევა ასევე, სტანდარტების შესაბამის სანიტარულ-ჰიგიენურ პირობებსა და საბავშვო ბაღებში კვების ხარისხის უზრუნველყოფას.