,,დარისპანის გასაჭირმა“ სცენიდან ეკრანზე გადაინაცვლა

,,დარისპანის გასაჭირმა“ სცენიდან ეკრანზე გადაინაცვლა. სამოყვარულო დონეზე გადაღებულ ფილმში ,,ოთარ აბაშიძის სახელობის სახალხო თეატრის“ მსახიობები თამაშობენ. ფილმის რეჟისორი და მთავარი როლის შემსრულებელი ირინე ჩხეიძე გახლავთ, ოპერატორი ლაშა ნიქაბაძე.
,,დარისპანის გასაჭირი“ პირველად ხარაგაულში 1990 წელს დაიდგა. სპექტაკლის რეჟისორი დიმიტრი ბოგვერაძე (მეუფე დოსითეოზი) გახლდათ. 25 წლის შემდეგ, ირინე ჩხეიძის რეჟისორობით, სპექტაკლი ხარაგაულის თეატრის რეპერტუარში კვლავ დაბრუნდა.
სპექტაკლის ვიდეო ვერსია ხარაგაულის მუნიციპალიტეტის სოფელ სხლითში მდინარაძეების ოჯახში გადაიღეს.
ფილმის პრემიერა ხარაგაულის კინოთეატრში შედგა. პრემიერის დასასრულს რეჟისორმა ირინე ჩხეიძემ დაუღალავი შრომისათვის და უანგაროდ გაწეული დახმარებისათვის მადლობა გადაუხადა ფილმის ოპერატორს ლაშა ნიქაბაძეს. ასევე, მადლობა გადაუხადეს ოლეგი, ცისლალი და ცირა მდინარაძეების ოჯახს, რომლებმაც მსახიობთა დასს არჩვეულებრივად უმასპინძლეს და მუშაობისათვის შესაფერისი გარემო შეუქმნეს .
ქალბატონი ირინე ჩხეიძის ინფორმაციით, ფილმის DVD ვერსია ხარაგაულის ყველა სკოლას, საჩუქრად გადაეცემა.
ირინე ჩხეიძე: ,,ჩვენ დავიწყეთ ახალი პროექტი ,,თეატრი სკოლისათვის“. ბავშვებს საშუალება ექნებათ ჩვენი თეატრის შესრულებით ადგილზე იხილონ ,,დარსიპანის გასაჭირი“. პროექტის ფარგლებში გათვალისწინებულია, მოსწავლეებმა სპექტაკლზე მუშაობის პროცესი ნახონ. ახალგაზრდები, ასევე დაესწრებიან თოჯინების თეატრის რეპეტიციებს. ისწავლიან როგორ ხდება გახმოვანება, გრიმის გაკეთება, როლის მორგება, როგორია ცხოვრება კულისებში.“
პროექტი აგრეთვე ითვალისწინებს ლექციების კურსს, ,,ჩემი თეატრის ისტორია“. ლექცებს წაიკითხავს რეჟიროსი ირინე ჩხეიძე. პირველი შეხვედრა მოსწავლეებთან მე-2 საჯარო სკოლაში მარტის ბოლოს გაიმართება.