ფარცხნალში ლიტერატურული კონკურსი „ოდეონი 2016" და სამხატვრო პლენერი „გამა“ დასრულდა

29 მაისსს ლიტერატურული კონკურსი „ოდეონი 2016" და სამხატვრო პლენერი „გამა," სოფელ ფარცხნალში, ოფიციალურად დაიხურა. ლიტერატურული კონკურსის და პლენერ „გამას“ მონაწილეებმა საკონკურსო ნამუშევრები 24 საათის განმავლობაში შექმნეს. დასკვითი ღონისძიების პარალელურად მოეწყო მხატვართა ნამუშევრების გამოფენა.
ღონისძიებას, ხარაგაულის მუნიციპალიტეტის გამგებელი კობა ლურსმანაშვილი, ადგილობრივი ხელისუფლების წარმომადგენლები, ჟიურის თავმჯდომარე როსტომ ჩხეიძე, ჟიურის წევრები, სოფელ ფარცხნალის მკვიდრნი და სხვა მოწვეული სტუმრები ესწრებოდნენ.
ხარაგაულის ადგილობრივი თვითმმართველობის წარმომადგენლებმა კონკურსის მონაწილეებს მადლობის სიგელები და სიმბოლური საჩუქრები გადასცეს. მუნიციპალიტეტის გამგებელმა კობა ლურსმანაშვილმა მადლობა გადაუხადა სოფელ ფარცხნალის მოსახლეობას კონკურსისადმი გაწეული მხარდაჭერისა და სტუმართმოყვარეობისთვის.
ლიტერატურული კონკურსი „ოდეონი 2016"– ის ჟიურის თავმჯდომარე როსტომ ჩხეიძე: „ეს დღე არის ლიტერატურითა და მხატვრობით დამუხტული დღე. არაერთხელ მითქვამს და კიდევ ერთხელ მინდა გავიმეორო, ხარაგაული არის ერთ-ერთი ძარღვი ქართული კულტურისა და ის სოფელი, სადაც ახლა ჩვენ ვიმყოფებით არის აღბეჭდილი გალაკტიონ ტაბიძის ცხოვრებაში. აქ გალაქტიონი დადიოდა... აქ ქმნიდა თავის შედევრებს... მადლობა მინდა გადავუხადო ბატონ კობას, ძალიან ცოტა გვყავს გამგებელი რომელიც ამბობს, რომ პრიორიტეტი არის კულტურა. სახელმწიფო არის კულტურა და თუ კულტურა არ გაქვს არ გაქვს სახელმწიფო. სახელმწიფო ძალიან კარგად ჩანს ხარაგაულში, ფარცხნალში. ეს არის ერთი გამონათება იმ კულტურული ცხოვრებისა, რაც ხარაგაულში ტრიალებს. თავდაპირველად ლიტერატურული კონკურსს 10 მონაწილე ჰყავდა, დღეს კი აქ მთელი საქართველოდან გვყავს კონკურსანტები და იქმნება ლიტერატურული შედევრები.“
ლიტერატურული კონკურსის საუკეთესო პროზაულ და პოეტურ ნაწარმოების ავტორებს ჟიური გამოავლენს.
ლიტერატურულ კონკურსში, მთელი საქართველოს მასშტაბით, მონაწილეობას 27 მწერალი ღებულობდა, სამხატვრო პლენერში კი 28 მხატვარი.
კონკურსზე გამოვლინდება საუკეთესო პროზაული და პოეტური ნაწარმოების ავტორები. შედეგები ივნისის შუა რიცხვებში გახდება ცნობილი. გამარჯვებულებს 400-400 ლარი გადაეცემათ.