აბრეშუმის ძაფის საცდელ ამოხვევას ხარაგაულში მხარის გუბერნატორი და ადგილობრივი ხელისუფლების წარმომადგენლები ესწრებოდნენ

ხარაგაულში მეაბრეშუმეობის აღდგენისა და განვითარებისთვის საპილოტე პროექტი შეიქმნა. ,,აბრეშუმი ხარაგაულიდან“ ასე  ჰქვია პროექტს,  რომლის ინიციატორები  ხარაგაულის მუნიციპალიტეტის გამგებელი კობა ლურსმანაშვილი, გამგებლის მრჩევლები სოფლის მეურნეობის საკითხებში მურმან არჯევანიძე და გია თავზარაშვილი არიან. საპილოტე პროექტის განსახორციელებლად ხარაგაულის მკვიდრმა, აგრარული უნივერსიტეტის მეაბრეშუმეობის კათედრის პროფესორმა,  თინა დალალიშვილმა, ჯგუფს აბრეშუმის ჭიის გრენი სრულიად უსასყიდლოდ გადმოსცა. მაისის თვეში ჩატარდა ექსპერიმენტი აბრეშუმის პარკის დამზადებისთვის და 22 ივნისს  უკვე პარკის პირველი პარტიის მიღება დაიწყო. ამის  შემდეგ სპეციალური დანადგარის მეშვეობით, რომელიც მუნიციპალიტეტს ცნობილმა ბიზნესმენებმა, ძმებმა „ასკანელებმა“ საჩუქრად გადმოსცეს აბრეშუმის ძაფის ამოხვევა  მოხდა. 

პროცესს, იმერეთის გუბრენატორი ბატონი გივი ჭიჭინაძე, გუბერნატორის მოადგილე იოსებ ხახალეიშვილი, მუნიციპალიტეტის გამგებელი კობა ლურსმანაშვილი, გამგებლის მოადგილეები და  ადგილობრივი ხელისუფლების სხვა წარმომადგენლები ესწრებოდნენ.

,,დიდი საქმის კეთება დაიწყო ხარაგაულში.  მეაბრეშუმეობა საქართველოში უძველესიდარგი იყო   და  ჩვენი აბრეშუმი მსოფლიოში ყველაზე ხარისხიანი. ბოლო 30 წელია საქართველოში აბრეშუმის ძაფი არ ამოხვეულა და   დღეს, მოხარული ვარ, რომ ეს ხარაგაულში ხდება პირველად. ამ მუნიციპალიტეტს მეაბრეშუმეობის დიდი ტრადიციები აქვსდა იმედია ეს ტრადიციები გაგრძელდება “-განაცხადა იმერეთის მხარის გუბერნატორმა, გივი ჭიჭინაძემ.

საქართველოსთვის უმნიშვნელოვანეს ფაქტად მიიჩნევს მეაბრეშუმეობის აღორძინებას გოჩა ჩხაიძე     და იგი მოხარულია,  რომ  ამ კუთხით პირველი რეალური ნაბიჯები ხარაგაულში გადაიდგა - ,,ქართული აბრეშუმი საკმაოდ ხარისხიანი იყო და ეს ტრადიცია უნდა აღდგეს. ეს იქნება პოზიტიური ნაბიჯი და მნიშვნელოვნად განავითარებს ქართულ ეკონიმიკას. მნიშვნელოვანია, რომ პროექტის წარმატებით განხორციელება ადგილობრივების დასაქმებსაც შეუწყობს ხელს“.

ხარაგაულის მუნიციპალიტეტის გამგებელი,   კობა ლურსმანაშვილი  მოხარულია, რომ ხარაგაულში მეაბრეშუმეობის ტრადიცია კვლავ აღსდგა და  მადლობას უხდის ყველა იმ ადამიანს, ვისაც ამ პროექტის განხორციელებაში წვლილი მიუძღვის.

,,ხარაგაული წარსულ წლებში მეაბრეშუმეობით გახლდათ დაკავებული.  ბოლო წლებია ეს ტრადიცია მიტოვებულია და ახლა ძალზედ სასიხარულია, რომ ჩვენს მუნიციპალიტეტში მეაბრეშუმეობა აღდგება.  მნიშვნელოვანია, რომ ინიციატივა  თავად  ხარაგაულიდან  წამოვიდა.  დიდი დახმარება გაგვიწია  იმერეთის გუბრენიამ და ძმებმა   „ასკანელებმა“, რისთვისაც მადლობა მინდა გადავუხადო მათ. ვფიქრობ, ხარაგაული უახლოეს მომავალში შეძლება, მეაბრეშუმეობის კუთხით ერთ-ერთი წამყავნი მუნიციპალიტეტი იყოს”-განაცხადა მუნიციპალტეტის გამგებელმა.