ხარაგაულის ცენტრალურ ბიბლიოთეკაში ინტელექტუალური კონკურსი გაიმართა

ხარაგაულის ცენტრალურ ბიბლიოთეკაში ინტელექტუალური კონკურსი „რა? სად?“როდის?“ ჩატარდა. ინტელექტუალურ თამაშში ხარაგაულის მუნიციპალიტეტის 18 საჯარო სკოლის გუნდი მონაწილეობდა. გუნდები   6-6 მონაწილით იყო დაკომპლექტებული.  მონაწილე გუნდებმა თავიანთი შესაძლებლობები ბოლომდე გამოამჟღავნეს და ერთმანეთს ღირსეული მეტოქეობა გაუწიეს. საბოლოოდ, შეჯიბრის  გამარჯვებული  ხარაგაულის N3 საჯარო სკოლის გუნდი გახდა,  რომელმაც ფინალურ შეხვედრაზე ხარაგაულის N2 საჯარო  სკოლას ერთი ქულით აჯობა. მე-3  ადგილი კი- ვარძიის საჯარო სკოლამ დაიმსახურა.

ხარაგაულის ცენტრალური ბიბლიოთეკის დირექტორის, ნიკოლოზ მაჭავარიანის განცხადებით, მოსწავლეებმა საერთო ჯამში კარგი  შედეგი აჩვენეს. თუმცა,  საჭიროა, რომ  წიგნებს კიდევ უფრო მეტად დაუმეგობრდნენ.  „პროექტი  ეროვნული ბიბლიოთეკის ინიციატივით, ქვეყნის მასშტაბით, პირველად ტარდება. იმედი მაქვს, რომ მსგავსი პროექტები ახალგაზრდებს წიგნისადმი ინტერესს გაუჩენს. ჩვენი სურვილია, რომ სოფლის ახალგაზრდები აქტიურად ჩაერთონ მსგავსი სახის ღონისძიებებში. ვგეგმავთ  სოფლის ბიბლიოთეკების მეტად დატვირთვას და მათი  წიგნადი ფონდით გამდიდრებას. სამი სოფლის ბიბლიოთეკაში უკვე გვაქვს ინტერნეტ ქსელი, ვფიქრობთ, სხვა სოფლის ბიბლიოთეკებისთვისაც იყოს ეს ხელმისაწვდომი. ინტერნეტი დამატებით საშუალებას მისცემს სოფლის მოსახლეობას გაეცნოს საჭირო ინფორმაციას,“ -  აღნიშნა ნიკოლოზ მაჭავარიანმა.

ინტელექტუალური  ჩემპიონატი „რა? სად? როდის?  პროექტის „ჩვენი მკითხველის ფარგლებში“   ეროვნული ბიბლიოთეკის ინიციატივით ყველა მუნიციპალიტეტში ტარდება. პირველ ტურში გამარჯვებული რეგიონალურ შეჯიბრში მიიღებს მონაწილეობას, რომელიც 20 იანვარს ქალაქ ქუთაისში გაიმართება. რეგიონალურ ტურში გამარჯვებული გუნდი კი, 10 თებერვალს საქართველოს ეროვნულ ბიბლიოთეკაში ფინალურ შეჯიბრში ითამაშებს.