ზაურ ბერაძე თავისუფალ ჭიდაობაში (84კგ) საქართველოს ჩემპიონი გახდა

საერთაშორისო ტურნირების გამარჯვებულს, გრან-პრის მფლობელს, საქართველოს ჩემპიონს, ვერცხლის მედლისა და 60-მდე სიგელისა და გამარჯვების დიპლომის მფლობელს, ხარაგაულელ ზაურ ბერაძეს დღეს ადგილობრივი ხელისუფლების წარმომადგენლებმა შეხვედრა მოუწყვეს და გამარჯვება პირადად მიულოცეს.

19 წლის ზაურ ბერაძეს თავისუფალ ჭიდაობაში 60-მდე ადგილობრივ თუ საერთაშორისო ტურნირში აქვს მონაწილეობა მიღებული. მათ შორის 45 პირველი ადგილის მფლობელია. 2015-2016 წლებში აზერბაიჯანში აიღო გრან-პრი და პირველი ადგილი. 2016 წელს საბერძნეთში საერთაშორისო ტურნირი მოიგო. მოგებული აქვს ასევე, თბილისის პირველობა და რეგიონული პირველობა. 2016 წელს მოიგო ვერცხლის მედალი საქართველოს პირველობაზე.

ზაურ ბერაძე 2017 წელს, თავისუფალ ჭიდაობაში, 84 კგ წონით კატეგორიაში საქართველოს ჩემპიონი გახდა. ის ჩემპიონატში ხარაგაულის სახელით მონაწილეობდა. ასევე, 2017 წელს მან ბულგარეთში გამართულ საერთაშორისო ტურნირზე პირველი ადგილი დაიკავა.

გამგეობის განათლების, კულტურის, სპორტის და ახალგაზრდობის საქმეთა სამსახურის უფროსმა ირინე ჩხეიძემ ზაურ ბერაძეს მიღწეული გამარჯვებები მიულოცა და წარმატებები უსურვა. დამსწრე საზოგადოებას 5 წუთიანი ვიდეოკოლაჟი შესთავაზა, სადაც ზაურის ჭიდაობები და გამარჯვებებია ასახული. ჩემპიონს გამარჯვება მიულოცა ბაღდათი-ხარაგაულის მაჟორიტარმა დეპუტატმა, კობა ლურსმანაშვილმა, ხარაგაულის მუნიციპალიტეტის გამგებელმა ნიკოლოზ თოფურიძემ, საკრებულოს თავმჯდომარე მანანა ბარბაქაძემ და საკრებულოს წევრებმა.

ხარაგაულის მუნიციპალიტეტის გამგეობამ ზაურ ბერაძეს ფულადი ჯილდო, 500 ლარის ოდენობით, გადასცა, რომელიც მას პირად ანგარიშზე ჩაერიცხება.

სიმბოლური საჩუქრები გადასცეს ჩემპიონს ასევე, გამგეობის კულტურის სამსახურმა და საკრებულოს კულტურის, განათლების და ახალგაზრდულ საქმეთა კომისიის თავმჯდომარე მარინე ვეფხვაძემ.

ზაურ ბერაძემ მადლობა გადაუხადა ადგილობრივი ხელისუფლების წარმომადგენლებს ყურადღებისთვის და აღნიშნა, რომ ეს მისთვის დიდი სტიმულის მიმცემია.