ღონისძიებას მერის პირველი მოადგილე არჩილ მაღრაძე დაესწრო

ხარაგაულში საქართველოს დემოკრატიული რესპუბლიკის დაარსებიდან 100 წლის იუბილისადმი მიძღვნილი კვირეული ვერტყვიჭალაში საჯარო სკოლისა (დირექტორი ლენა აბაშიძე) და კულტურის ცენტრის (დირექტორი თემურ ბლუაშვილი) მოსწავლეების მონაწილეობით გამართული კონცერტით დაიწყო. ღონისძიებას ხარაგაულის მუნიციპალიტეტის მერის პირველი მოადგილე, არჩილ მაღრაძე, ადგილობრივი თვითმმართველობის, განათლების პროფკავშირის ხარაგაულის ორგანიზაციისა და საგანმანათლებლო რესურსცენტრის წარმომადგენლები ესწრებოდნენ.

ღონისძიების დასაწყისში მცირე ისტორიული ექსკურსი გააკეთა კულტურის ცენტრის ხელმძღვანელმა და ისტორიის პედაგოგმა თემურ ბლუაშვილმა საზოგადოებას საუკუნის წინ მომხდარი მოვლენები გაახსენა. ახალგაზრდებმა ლექსები წაიკითხეს და მუსიკალური ნომრები წარმოადგინეს.

ხარაგაულის მუნიციპალიტეტის მერის პირველმა მოადგილემ, არჩილ მაღრაძემ მადლობა გადაუხადა სკოლის კოლექტივს, კულტურის ცენტრს და მოსწავლეებს ასეთი აქტიურობისთვის. არჩილ მაღრაძემ მათ საქართველოს დამოუკიდებლობის 100 წლის იუბილე მიულოცა და წარმატებები უსურვა.

განათლების პროფკავშირის ხარაგაულის ორგანიზაციის ხელმძღვანელმა, ლალი სებისკვერაძემ ვერტყვიჭალის საჯარო სკოლის დირექტორს, ლენა აბაშიძეს სამადლობელი სიგელი გადასცა და დამსწრე საზოგადოებას საქართველოს დამოუკიდებლობის დღეს მიულოცა.
ღონისძიების დაწყებამდე მოწვეული სტუმრები თემურ ბლუაშვილის მიერ მომზადებულ გაზეთს -„თვალსაწიერი“ გაეცნენ, რომელიც საქართველოს დემოკრატიული რესპუბლიკის დამოუკიდებლობის 785 დღეს მიეძღვნა.