მიმდინარე წელს ხარაგაულში 11 სკვერის რეაბილიტაცია მოხდება

4 ივნისს ხარაგაულის მუნიციპალიტეტის საკრებულოს მორიგი სხდომა გაიმართა.

დღის წესრიგით გათვალისწინებული ერთ-ერთი საკითხი, რომელიც რეგიონული განვითარების ფონდიდან 2018 წელს დასაფინასებელ პროექტებში ოთხი ინფრასტრუქტურული პროექტის  დამატებას გულისხმობდა, დეპუტატებს, მერიის ინფრასტრუქტურის სამსახურის უფროსმა თემური თაბუკაშვილმა წარუდგინა.

სამსახურის უფროსი განმარტავს, რომ 2018 წელს მერიას დამატებით, უნდა მიეღო 700 000 ლარი, რომლითაც ხარაგაულის ორ სოფელში საღანძილესა და ვერტყვიჭალაში საბავშვო ბაღები უნდა აშენებულიყო. რეგიონული განვითარების ფონდიდან მოხდა მხოლოდ, 500 000 ლარის დამატება. გამომდინარე იქედან, რომ აღნიშნულ სოფლებში ბაღების მშენებლობა გარკვეულ მიზეზთა გამო გადაიდო, ინფრასტრუქტურის სამსახურის გადაწყვეტილებით, 2018 წელს, ხარაგაულში, დამატებით, შემდეგი პროექტები განხორციელდება:

11 სკვერის რეაბილიტაცია დაბა ხარაგაულში - 175 964 ლარი;

გზის მობეტონება ლაშის ადმინისტრაციული ერთეულის სოფელ ხემაღალში - 108 300 ლარი.

სოფელ  ხიდარში, შარიქაძეების საუბნო გზის რეაბილიტაცია - 120 831 ლარი;

სოფელ ვარძიის გზის რეაბილიტაცია( მესამე უბანი) – 121 308 ლარი.  

დეპუტატებმა წარმოდგენილი პროექტები მოიწონეს და დადებითად შეაფასეს.

დღესვე საკრებულოს სხდომაზე განიხილეს ასევე, მერიის კულტურის,   განათლების, სპორტის და ახალგაზრდულ  საქმეთა   სამსახურის   ანგარიში გაწეული მუშაობის შესახებ; საკითხი დეპუტატებს სამსახურის უფროსმა, ირინე ჩხეიძემ წარუდგინა. ანგარიში დადებითად შეფასდა და დეპუტატთა უმრავლესობამ ხაზგასმით აღნიშნა, რომ კულტურის სამსახური ერთ-ერთი ყველაზე წარმატებული სამსახურია ხარაგაულში, რომ კულტურულ-საგანმანათლებლო და სპორტული ღონისძიებებით ხარაგაული ყოველთვის გამორჩეულია.

სხდომაზე დეპუტატებმა ასევე, მოისმინეს  საბიუჯეტო ცვლილება, რომელიც საფინანსო-საბიუჯეტო სამსახურის უფროსმა, ვლადიმერ გელაშვილმა წარადგინა.

ვლადიმერ გელაშვილის ინფორმაციით, მთავრობის N136 განკარგულებით ხარაგაულის მუნიციპალიტეტს დამატებით თანადაფინანსებისთვის 275 100  ლარი, ხოლო ბჟინევის გზის რეაბილიტაციისთვის მთის განვითარების ფონდიდან - 320 300 ლარი გამოეყო.

ვლადიმერ გელაშვილის განმარტებით, 18 600 ლარი უნდა მიიმართოს ბორის სკოლა- პანსიონში არსებული ბაღის სუბსიდირებისთვის. 

3 600 ლარი გამოიყოფა, ასევე, პორტატული კომპიუტერების შესაძენად, რომლებსაც მუნიციპალიტეტის მერის ინიციატივით, ინტელექტჩემპიონატ  „ეტალონში“ პირველ სამ ადგილზე გასულ  მოსწავლეებს  საჩუქრად გადასცემენ.

დღევანდელ საკრებულოს სხდომაზე ასევე განხილული იყო შემდეგი საკითხები:

2. ხარაგაულის მუნიციპალიტეტის საკრებულოს განათლების, კულტურის და ახალგაზრდულ საქმეთა კომისიის ანგარიში გაწეული მუშაობის შესახებ;

მომხს: დავით კიკნაძე

3. ხარაგაულის მუნიციპალიტეტის საკრებულოს ელექტრონული საქმის წარმოების წესი

მომხს:ოთარ ლურსმანაშვილი

4. საჯარო ინფორმაციის ელექტრონული ფორმით მოთხოვნისა და პროაქტიული გამოქვეყნების შესახებ;

მომხს:ოთარ ლურსმანაშვილი