სამთავრობო ინიციატივა „აწარმოე საქართველოში“ პროგრამის ფარგლებში, ახალი პროექტი  „მიკრო და მცირე მეწარმეობის ხელშეწყობა“ დაიწყო

საქართველოს ეკონომიკისა და მდგრადი განვითარების სამინისტრო, სოფლის მეურნეობის სამინისტროსთან ერთად  ახორციელებს  ახალ სამთავრობო პროგრამას „აწარმოე საქართველოში“, რომელიც მიმართულია წარმოების შემდგომი განვითარებისა და წახალისებისაკენ. პროექტის  ფარგლებში 20 აპრილს, ქალაქ ზესტაფონში, რევაზ ლაღიძის სახელობის სამუსიკო სკოლაში, საქართველოს ეკონომიკისა და მდგრადი განვითარების მინისტრის მოადგილე ქეთევან ბოჭორიშვილი,  მეწარმეობის განვითარების სააგენტოს დირექტორი გიორგი ციკოლია და რეგიონებში პროგრამის უშუალო განმახორციელებელი ორგანიზაციის წარმომადგენლები იმყოფებოდნენ . შეხვედრას  ასევე ესწრებოდნენ  ხარაგაულის მუნიციპალიტეტის  გამგებლის მოადგილე თემურ ჩხეიძე და სხვა დაინტერესებული პირები.

აღნიშნული პროგრამის მიზანია, საქართველოში მეწარმეობის განვითარება, მეწარმის მხარდაჭერა, ახალი საწარმოს შექმნის, არსებული საწარმოს გაფართოების ან გადაიარაღების ხელშეწყობა, ამასთანავე კერძო სექტორის კონკურენტუნარიანობისა და საექსპორტო პოტენციალის ზრდა ფინანსებზე, უძრავ ქონებასა და თანამედროვე ტექნოლოგიებზე ხელმისაწვდომობის გამარტივებისა და საკონსულტაციო მომსახურების გაწევის საშუალებით.

პროგრამაში მონაწილეობის მსურველი მეწარმე, ფინანსურ საკითხთან დაკავშირებით, მიმართავს კომერციულ ბანკს, რომელიც პროგრამით და  მის მიერ განსაზღვრული კრიტერიუმების მიხედვით ამტკიცებს კრედიტს. თუ ბენეფიციარი ინდუსტრიული საწარმოს პროექტს წარმოადგენს, ის უნდა აკმაყოფილებდეს შემდეგ მოთხოვნებს: დაფინანსებული სესხით აუცილებლად უნდა შეიქმნას მხოლოდ ახალი საწარმო, ხოლო სოფლის მეურნეობის მიმართულებისას, ზემოთ  აღნიშნულ მოთხოვნებს ემატება სანიტარული და სურსათის უვნებლობის სტანდარტების დაცვა.

პროგრამის ფარგლებში დაწყებულია პროექტის „მიკრო და მცირე მეწარმეობის ხელშეწყობის“ განხორციელება, რომელიც ხელს უწყობს ადგილობრივ მოსახლეობას საკუთარი საქმის წამოწყებაში. შეხვედრა გაიმართა მოკლე პრეზენტაციისა და კითხვა – პასუხის ფორმატით, სადაც ნებისმიერ დაინტერესებულ პირს შეეძლო  უშუალოდ პროგრამის ინიციატორებისა და განმახორციელებლებისგან მიეღო ამომწურავი ინფორმაცია და ჩართულიყვნენ  ახალ სამთავრობო ინიციატივაში.მიკრო და მცირე მეწარმეობის ხელშეწყობის პროგრამის განხორციელება 2015 წლის 15 მარტიდან დაიწყო და განცხადებების  მიღება 18 მაისამდეა შესაძლებელი.

აღნიშნულ პროგრამასთან დაკავშირებით საქართველოს ეკონომიკისა და მდგრადი განვითარების მინისტრის მოადგილემ, ქეთევან ბოჭორიშვილმა აღნიშნა:   ,,სამთავრობო ინიციატივა „აწარმოე საქართველოში“ პროგრამის ფარგლებში,  ახალი პროექტი „მიკრო და მცირე მეწარმეობის ხელშეწყობა“ დაიწყო, რომლის მთავარი მიზანი რეგიონებში, მიკრომეწარმეობის და ბიზნესის გააქტიურებაა.  მეწარმეებს ორი მიმართულებით ვეხმარებით: პირველი უნარების გაუმჯობესებასა და გაღრმავებაში, რაც შესაძლებლობას მისცემს მეწარმეს მოამზადოს გამართული ბიზნეს პროექტი. რათა მოხდეს მისი განვითარება და გაფართოება.   მეორე გამარჯვებული ბიზნეს პროექტის ავტორები, მიიღებენ სახელმწიფოსგან თანამონაწილეობრივ თანხას, გრანტს არაუმეტეს 5 000 ლარის ოდენობით ერთ მეწარმე სუბიექტზე; თუ მოხდება ორი მეწარმის გაერთიანება, შესაბამისად ეს იქნება არაუმეტეს 10 000 ლარის ოდენობით, ხოლო სამი მეწარმის შემთხვევაში არაუმეტეს 15 000 ლარი. მნიშვნელოვანია, რომ თანხასთან ერთად მეწარმე იღებს განათლებას და უნარების გაუმჯობესებას, რაც ერთ–ერთი მთავარი საწინდარია, რომ იყოს უფრო მეტი სიცოცხლის უნარიანი და უფრო მეტი ჯანსაღი ახალი პროექტი, რომელიც   რა თქმა უნდა დროთა განმავლობაში განვითარდება.“