ხარაგაულის ო. აბაშიძის  სახელობის სახალხო თეატრმა ნომინაციაში „ანსამბლური სპექტაკლი“ გაიმარჯვა

21 მაისიდან 5 ივნისის ჩათვლით, ქ. ქუთაისში, ლადო მესხიშვილის სახელობის თეატრში ფესტივალი „თეატრალური იმერეთი 2015“ მიმდინარეობდა. ფესტივალი, 5 ივნისს, ხარაგაულის ო. აბაშიძის  სახელობის სახალხო თეატრმა,  სპექტაკლით -  „დარისპანის გასჭირი (რეჟისორი ირინე ჩხეიძე) დახურა. სპექტაკლის ჩვენებას ბელგიისა და ჰოლანდიის ეპისკოპოსი მეუფე დოსითეოზი, (25 წლის წინ, ხარაგაულში, მისი რეჟისორობით დაიდგა პირველად „დარისპანის გასაჭირი“) ხარაგაულის მუნიციპალიტეტის გამგებელი, კობა ლურსმანაშვილი, სხვა თანამდებობის პირები და ხარაგაულელი გულშემატკივრები ესწრებოდნენ.

ხარაგაულის თეატრი ფესტივალში, როგორც ყოველთვის, ამჯერადაც  წარმატებით წარსდგა. სპექტაკლის ჩვენებამ   სრული ანშლაგითა და ოვაციებით ჩაირა. ფესტივალის ჟიურის თავმჯდომარემ, თეატრმცოდნემ ლაშა ჩხარტიშვილმა აღნიშნა, რომ ხარაგაულის  თეატრი  იმერეთის მასშტაბით ერთ-ერთი ყველაზე წარმატებულია და იგი მიმდინარე ფესტივალზეც  ღირსეულად წარსდგა. აღსანიშნავია, რომ ფესტივლაში იმერეთის რეგიონში მოღვაწე  14 თეატრი იღებდა მონაწილეობას.

„თეატრალური იმერეთი 2015“,-ის დაჯილდოების ცერომონიალი - 6 ივნისს ქუთაისში  გაიმართა. გამარჯვებულები სხვადასხვა ნომინაციაში  სპეციალურად შექმნილმა ჟიურიმ (ჟიურის თავმჯდომარე ლაშა ჩხარტიშვილი, ჟიურის წევრები: ნერონ აბულაძე და თეიმურაზ ლანჩავა)  გამოავლინა. ხარაგაულის თეატრმა  ნომინაციაში- „ანსამბლური სპექტაკლი“ გაიმარჯვა, ხოლო რეჟისორი ირინე ჩხეიძე „დარისპანის გასაჭირში“ განსახიერებული   ქალის როლის (მართა)  მაღალპროფესიონალურ დონეზე შესრულებისათვის დაჯილდოვდა. ქალბატონ ირინეს  დიპლომი „მწერალთა, ხელოვნათა და მეცნიერთა ეროვნულმა აკადემიამ“ გადასცა.

დაჯილდოების ცერემონიალზე  ხარაგაულელმა, მრავალ კონკურსში გამარჯვებულმა სალომე კვირაკაშვილმა იმღერა.  სალომე სულ ცოტა ხნის წინ ფესტივალის  „იმერეთის ხმის“ გამარჯვებული და გრანპრის მფლობელი გახდა.