სოფლებში პრიორიტეტული პროექტების შესარჩევად მოსახლეობასთან შეხვედრები დასრულდა

5 ოქტომბრიდან, ხარაგაულის მუნიციპალიტეტის სოფლებში გამგებლის წარმომადგენლებმა კრებების გამართვა დაიწყეს. შეხვედრებზე, მოსახლეობამ „სოფლის მხარდამჭერი პროგრამის“ ფარგლებში,  2016 წელს დასაფინანსებელ პროექტებზე იმსჯელეს. საღანძილის ადმინისტრაციულ ერთეულში შეხვედრა 7 ოქტომბერს გაიმართა, რომელსაც გამგებლის წარმომადგენლებთან კოორდინირების განყოფილების უფროსი, გია ჭიპაშვილი, საღანძილის ადმინისტრაციული ერთეულის მაჟორიტარი დეპუტატი, დავით კიკნაძე და გემგებლის წარმომადგენელი, კობა ყრუაშვილი ესწრებოდნენ.  

საღანძილის მოსახლეობამ სოფელში არსებული სხვადასხვა პრობლემა დაასახელა. მათთვის პრიორიტეტული შიდა საუბნო გზების შეკეთებაა, რომელსაც აუცილებელია ჰქონდეს სანიაღვრე არხებიც. სასწრაფოდაა ჩასატარებელი გზის რებილიტაცია ჭანკოტაძეებისა და ფხალაძეების უბანში, სადაც  მოსახლეობა ბეტონის საფარის დაგებას და სანიაღვრე არხების გაკეთებას ითხოვს. ანალოგიური პრობლემებია მესხების, ბაკურაძეებისა და კიკნაძეების უბნებშიც. ცენტრალურ გზაზე კი, სანიაღვრე არხებია დასაწმენდი. სოფელში მწვავედ დგას ასევე წყლის პრობლემა. 2016 წელს „სოფლის მხარდამჭერი პროგრამის“ ფარგლებში საღანძილეს 8 000 ლარი გამოეყოფა. აღნიშნული თანხით გამოკვეთილი პრობლემები ნაწილობრივ მოგვარდება.

აზრთა სხვადასხვაობა იყო სოფელ ვანსა და სხლითში  გამართულ კრებებზე, აქ მოსახლეობა ძირითადად გრძელვადიან პროექტებს ანიჭებს უპირატესობას. სოფელ ვანში „სოფლის მხარდამჭერი პროგრამის“ ფარგლებში 5 000 ლარი, ხოლო სხლითში 4 000 ლარია გამოყოფილი. სოფელ ვანში მოსახლეობა შეჯერდა, რომ ცენტრალურ გზაზე ბეტონის სანიაღვრე არხები მოაწყონ და ასევე ააგონ წისქვილი.  მოსახლეობა ასევე ითხოვს  ექთნის მომსახურებას.

 სოფელ სხლითის მოსახლეობა ორ ძირითად პრობლემაზე საუბრობს. სოფელში გზებია შესაკეთებელი და მნიშვნელოვანია ასევე სარიტუალო დარბაზის აგება. სოფლის მოსახლეობამ პრიორიტეტად გამოყო, რომ 2016 წლის სოფლის პროექტებში გათვალისწინებული თანხით სხლითში ძველი მაღაზიის შენობა გადაკეთდეს, სადაც სარიტუალო დარბაზი განთავსდება.

ჩხერში ცენტრალური გზის შესაკეთებლად, სავარაუდოდ 7 000 ლარს დახარჯავენ. ასევე იგეგმება ხარაგაულიდან სოფელ ჩხერში ასასვლელი გზის შეკეთებაც, რომელიც ძალზე მძიმე მდგომარეობაშია.

ჯაფაროულში „სოფლის მხარდამჭერი პროგრამის“ ფარგლებში ასფალტირებული გზა 150 მეტრის სიგრძეზე გაგრძელდება, რომლისთვისაც დაახლოებით 6 000 ლარი გამოიყოფა.

სოფელ ზარანში სოფლის ცენტრალურ გზაზე მოსახლეობამ პრიორიტეტად გარე განათების მოწყობა გადაწყვიტა.

 ხარაგაულის მუნიციპალიტეტის სოფლებში ძირითადი პრიორიტეტების გამოსავლენად მოსახლეობასთან შეხვედრები 12 ოქტომბერს დასრულდა.