ხარაგაულში, 2016 წელს, მილიონ ლარზე მეტი საბავშვო ბაღების მშენებლობაში დაიხარჯება

2016 წელს ხარაგაულში საბავშვო ბაღების მშენებლობა ისევ პრიორიტეტად რჩება. წელს რეგიონული განვითარების ფონდიდან დაბის N2 საბავშვო ბაღის, ხევის, ღორეშის, მოლითის და წიფის სკოლამდელი აღზრდის დაწესებულებათა სარეაბილიტაციოდ 400 000 ლარამდე თანხა გამოიყო. აღსანიშნავია, რომ რგფ-იდან დაფინანსებულ პროექტებში მუნიციპალიტეტმა(თითოეულ პროექტზე) 5%-იანი თანადაფინანსება უნდა გაიღოს.

N2 საბავშვო ბაღი - 139 251 ლარი;

წიფის საბავშვო ბაღი - 96 799 ლარი;

ხევის საბავშვო ბაღი - 88 710 ლარი;

მოლითის საბავშვო ბაღის რეაბილიტაცია - 26 593 ლარი;

ღორეშის საბავშვო ბაღი - 42 045 ლარი;

გარდა ამისა საბავშვო ბაღების მშენებლობა იგეგმება სოფელ დიდვაკესა და საღანძილეში. აღნიშნული პროექტები მუნიციპალური განვითარების ფონდიდან დაფინანსდება. როგორც ჩვენთან საუბარში ხარაგაულის მუნიციპალიტეტის სკოლამდელ დაწესებულებათა გაერთიანების დირექტორმა, ირმა სებისკვერაძემ აღნიშნა, საღანძილისა და დიდვაკის საბავშვო ბაღები თამაედროვე სტანდარტების შესაბამისი იქნება.

 საღანძილის საბავშვო ბაღის მშენებლობისთვის 538 801 ლარი დაიხარჯება, დიდვაკის საბავშვო ბაღის მშენებლობა კი, 327 521 ლარით დაფინანსდება.

გასული 3 წლის განმავლობაში ხარაგაულის მუნიციპალიტეტში 8 ახალი საბავშვო ბაღი აშენდა. პროექტები რეგიონული განვითარების ფონდიდან დაფინანსდა.