ხარაგაულის მუნიციპალიტეტიდან მაღალმთიან დასახლებათა ნუსხაში ამჟამად 6 სოფელია შესული

ხარაგაულის მუნიციპალიტეტიდან მაღალმთიან დასახლებათა ნუსხაში 6 სოფელი შევიდა: გოლისი, გოლათუბანი, გუდათუბანი, ფონა, ნუნისი და პატარა სახვლარი.

საქართველოს მთავრობის 2015 წლის 30 დეკემებრის N671 დადგენილების თანახმად ხარაგაულის მუნიციპალიტეტის სოფლებს: წიფას, ზვარეს, ჩრდილს და ნადაბურს  მაღალმთიანი დასახლების სტატუსი შეუწყდა. ხარაგაულის მუნიციპალიტეტის ადგილობრივი ხელისუფლება აქტიურად მუშაობს, რათა ზემოთ ჩამოთვლილმა 4-მა სოფელმა მაღალმთიანი დასახლების სტატუსი აღიდგინოს.

 ხარაგაულის მუნიციპალიტეტის გამგებელი კობა ლურსმანაშვილმა 5 თებერვალს სოფლის მეურნეობის მინისტრს, ოთარ დანელიას, საქართველოს ინფრასტრუქტურისა და რეგიონული განვითარების მინისტრს, ნოდარ ჯავახიშვილს, საქართველოს სტატისტიკის ეროვნული სამსახურის აღმასრულებელ დირექტორს, მერი დაუშვილს და საჯარო რეესტრის ეროვნული სააგენტოს თავმჯდომარეს, პაპუნა უგრეხელიძეს წერილობით მიმართა. მუნიციპალიტეტის გამგებელი  აღნიშნულ ოთხ სოფელში არსებული მდგომარეობის შესახებ კონკრეტულ და დასაბუთებულ ინფორმაციას ითხოვს.

უწყებებიდან  მიღებული სტატისტიკური მაჩვენებლები და სოფლებში არსებული მდგომარეობა  ხარაგაულის მუნიციპალიტეტის გამგებელმა  საქართველოს მთავრობის წინაშე უნდა წარადგინოს და სტატისტიკური  მაჩვენებლების საფუძველზე, ზემოთ ჩამოთლილი 4 სოფლისათვის  მაღალმთიანი დასახელბის სტატუსის მინიჭების აუცილებლობა დაასაბუთოს.

საქართველოს რეგიონული განვითარებისა და ინფრასტრუქტურის სამინისტროს წარმომადგენლისა და მთის განვითარების საბჭოს წევრის, მამუკა აბულაძის განცხადებით, მაღალმთიანი დასახლებისთვის სტატუსის მისანიჭებლად კონკრეტული ვადები არ არსებობს. ყოველივე ზემოაღნიშნულიდან გამომდინარე, ხარაგაულის მუნიციპალიტეტის სოფლებს წიფას, ზვარეს, ჩრდილს და ნადაბურს ნამდვილად აქვთ რეალური შანსი მაღალმთიანი დასახლების სტატუსი აღიდგინონ.

მაღალმთიანი დასახლების სტატუსი დასახლების ნუსხაში შეტანიდან 10 წლის განმავლობაში არ გადაიხედება.

„მაღალმთიანი რეგიონების განვითარების შესახებ" საქართველოს კანონის თანახმად  მაღალმთიანი დასახლების სტატუსი 1582 დასახლებას მიენიჭა.