2016 წლის მცირე მიწიან ფერმერთა საგაზაფხულო სამუშაოების ხელშეწყობის პროექტის განხორციელება დაიწყო

ხარაგაულის მუნიციპალიტეტში 2016 წლის მცირე მიწიან ფერმერთა საგაზაფხულო სამუშაოების ხელშეწყობის პროექტის განხორციელება დაიწყო. ხარაგაულის მუნიციპალიტეტში ამ ეტაპზე, აღნიშნული პროგრამით სულ 11 657 ბენეფიციარი ისარგებლებს.

სოფლის მეურნეობის სამინისტროს ხარაგაულის მუნიციპალიტეტის საინფორმაციო საკონსულტაციო სამსახურიდან მოპოვებული ინფორმაციით, მოსარგებლეებს რომელთაც საკუთრებაში,  ან ფაქტობრივ მფლობელობაში გააჩნიათ 0,25 ჰა-მდე ჯამური ფართობის სასოფლო-სამეურნეო დანიშნულების მიწის ნაკვეთი „აგრო ბარათზე “ დაერიცხებათ  50 ქულა.

აღნიშნული ქულა, რომელიც 50 ლარს შეადგენს მოსარგებლეებს პირველ მარტს დაერიცხებთ. ხარაგაულის მუნიციპალიტეტში ასეთი მოსარგებლე 3 541-ია.  ასევე მოსარგებლეებს, რომელთაც საკუთრებაში, ან ფაქტობრივ მფლობელობაში გააჩნიათ 0,25 ჰა-დან - 1,25 ჰა-სჩათვლით ფართობის სასოფლო-სამეურნეო დანიშნულების მიწის ნაკვეთი, რომელსაც იყენებენ ერთწლიანი კულტურების მოსაყვანად:
გადაეცემათ ნაკვეთის ფართობის პროპორციული ღირებულების სასოფლო-სამეურნეო (ხვნის) ბარათი, 1 ჰექტარზე 140 ლარის გადაანგარიშებით.

ხარაგაულში ამ ტიპის ხვნის ბარათს სულ 8 116 მოსარგებლე მიიღებს.

აღსანიშნავია, რომ  ბარათის გადაცემისას გამგებლის წარმომადგენელმა მოსარგებლეს  უნდა აუხსნას ხვნის ბარათით სარგებლობის წესი.  მოსარგებელე უფლებამოსილია, გარკვეულ შემთხვევაში დააბრუნოს ხვნის ბარათი სააგენტოში, რათა ამ ბარათით გათვალისწინებული სარგებლის ექვივალენტი ქულების ოდენობა სააგენტომ მოსარგებლეს ჩაურიცხოს „აგრო ბარათზე“.

დაკარგული ანდაზიანებული ბარათი

დაკარგვის ან დაზიანებისას ხვნის ბარათი  შეიძლება გამოიცვალოს. თუ ბარათი მოსარგებლეზე გადაცემის შემდეგ დაზიანდა, მაშინ გამგებლის წარმომადგენელმა სააგენტოს უნდა მიმართოს წერილით, რომელსაც უნდა დაერთოს: მოსარგებლის ახსნა-განმარტება, დაზიანებული ბარათი და მოსარგებლის პირადობის ასლი. ხოლო  მოსარგებლეს თუ დაეკარგა ბარათი მაშინ საჭიროა გამგებლის წარმომადგენელმა მიმართოს სააგენტოს წერილით და თან დაურთოს: მოსარგებლის ახსნა-განმარტება, მოსარგებლის მიერ ბარათის დაკარგვის შესახებ პოლიციაში შეტანილი განცხადებისა და მოსარგებლის პირადობის დამადასტურებელი დოკუმენტის ასლები. 

აგრო ბარათი

მოსარგებლეებს ქულები დაერიცხებათ 2014-2015 წლებში „ლიბერთი ბანკის“ მიერ დარიგებულ „აგრო ბარათზე“.  თუ 2016 წლის საგაზაფხულო პროექტის მოსარგებელეს არ გააჩნია „აგრო ბარათი“, იგი უნდა მივიდეს „ლიბერთი ბანკის“ ნებისმიერ ფილიალში, სადაც მას გადასცემენ მისთვის განკუთვნილ „აგრო ბარათს“

თუ მოხდა მოსარგებლის აგრო-ბარათის“ დაკარგვა ან დაზიანება, უნდა მიმართოს „ლიბერთი ბანკის“ ფილიალს, სადაც მას გადასცემენ ახალ ბარათს.  დაკარგული „აგრო ბარათების“აღსადგენად, მოსარგებლემ  „ლიბერთი ბანკს“ უნდა მიმართოს  პირველ მარტამდე, რომ არ მოხდეს, მათ „აგრო ბარათზე“  დარიცხული თანხის სხვის მიერ გამოყენება. (დაკარგული „აგრო-ბარათის“  აღდგენა შეიძლება პირველი მარტის შემდეგაც, თუმცა თუ მოხდა დაკარგული „აგრო ბარათით“ ქულების გამოყენება, მაშინ ეს ჩაითვლება მოსარგებლის მიერ გამოყენებულად და მას დამატებითი ქულები აღარ დაერიცხება).

თუ მოსარგებლე არის უნარშეზღუდული და არ შეუძლია ბანკში მისვლა მისთვის განკუთვნილი „აგრო ბარათის“ ასაღებად, მაშინ საჭიროა მიმართოს გამგებლის წარმომადგენელს და მიუთითოს ნდობით აღჭურვილი პირი, რომლის სახელზეც დაიბეჭდება მისთვის განკუთვნილი „აგრო ბარათი“, რაზეც დაირიცხება შესაბამისი ქულები.