უფასო სამედიცინო შემოწმება დაახლოებით 200-მა ადამიანმა გაიარა

ხარაგაულის მოსახლეობას სამედიცინო მომსახურება არაინვაზიური კარდიოლოგიის ცენტრმა „სისტოლა“ და შპს „კარდიოექსპრესი“-ს ექიმთა 13 კაციანმა ჯგუფმა გაუწია.
მარინე ვეფხვაძე(საკრებულოს წევრი) : ,, უფასო სამედიცინო შემოწმებამ, მოსახლეობის მხრიდან საკმაო დიდი ინტერესი გამოიწვია. მთელი დღის განმავლობაში 200 მდე პაციენტს მოემსახურნენ. უყურადღებოდ არავინ დარჩენილა. ყველას გაეწია სათანადო მომსახურება, საჭიროების და მიხედვით დაურიგდათ მედიკამენტები. მსგავსი აქციები, ჩემი აზრით, სასარგებლო და კარგია მოსახლეობისათვის. მათთვის ვისთვისაც, სამედიცინო შემოწმება ხშირად, მთელი წლის განმავლობაშიც კი შეუძლებელია.“
ხარაგაულის მუნიციპალიტეტის გამგებელმა კობა ლურსმანაშვილმა მადლობა გადაუხადა ექიმთა ჯგუფს და მათ ხარაგაულის მოსახლეობის მიმართ გამოჩენილი გულისხმიერებისათვის და თანადგომისათვის მადლობის სიგელები გადასცა.
,, დღეს ხარაგაულის მოსახლეობის დიდმა ნაწილმა ისარგებლა თქვენი მომსახურებით. მნიშვნელოვანია, რომ ეს აქცია დედების დღეს დაემთხვა. ჩემთვის ძალიან ბევრს ნიშნავს, როდესაც ადამიანები ერთმანეთს ვაგრძნობინებთ, რომ ვჭირდებით. მუნიციპალიტეტი გაჯილდოვებთ და მადლობას გიხდით გულისხმიერებისათვის და ხარაგაულელთათვის გამოჩენილი თანადგომისათვის. თქვენ ამას ნამდვილად იმსახურებთ.“
ექიმთა ჯგუფის შემადგენლობაში იყვნენ. კარდიოლოგები: თამაზ ორაგველიძე, კონსტანტინე ზარქუა, ნათია ლიპარტელიანი, ნიკა მკალავიშვილი, ნათია ზაბახიძე, თინათინ დარბაიძე, მათა გუჯაბიძე, სოფიო წიქარიშვილი, თამთა ფიფია. ენდოკრინოლოგები: მაია ჩიქობავა, მანანა ბაციაშვილი; გასტროენტეროლოგ-ქირურგი: ლაშა სილოგავა. ჯგუფის ხელმძღვანელია ექიმ-კარდიოლოგი პაატა ქავთარია გახლდათ.
პაციენტთა მიღება ბორის სკოლა- პანსიონში (ყოფილი კიცხის სკოლა-ინტერნატის ტერიტორიაზე) 11.30 -დან 17 სთ-მდე ხდებოდა.
დაბა ხარაგაულის მოსახლეობას უფასოდ ემსახურებოდა მიკროავტობუსი.
სამედიცინო მომსახურების ჯგუფთან მოლაპარაკებებს საკრებულოს წევრი მარინე ვეფხვაძე გამგებელ, კობა ლურსმანაშვილთან შეთანხმებით აწარმოებდა.