ბაზალეთის მაჟორიტარმა დეპუტატმა აქტიური მკითხველები დაასაჩუქრა

ბაზალეთის სასოფლო ბიბლიოთეკა საბიბლიოთეკო კვირეულს შეუერთდა. ღონისძიება, ბიბლიოთეკის ეზოში მდგარი საუკუნოვანი ვერხვის ხის ძირში გაიმართა, რომელსაც ბაზალეთისა და ღარიხევის სკოლის პედაგოგები, მოსწავლეები, ბაზალეთის ადმინისტრაციული ერთეულის დეპუტატი, ვარლამ ჭიპაშვილი და გამგებლის წარმომადგენელი, თენგიზ ჭიპაშვილი ესწრებოდა.
ბაზალეთის ადმინისტრაციული ერთეულის დეპუტატი ვარლამ ჭიპაშვილი: „ამ ღონისძიებით, საბიბლიოთეკო კვირეულს ბაზალეთის სასოფლო ბიბლიოთეკაც შეუერთდა. ჩვენ „სოფლის განვითარების პროგრამის“ ფარგლებში შევძელით, რომ გვქონოდა ბიბლიოთეკა. მართალია მაშინ ოპონენტები გვაკრიტიკებდნენ, მაგრამ დღეს დავრწმუნდით, რომ ჩვენმა ჩანაფიქრმა გაამართლა. სოფელს მხოლოდ მოწესრიგებული ინფრასტრუქტურა ვერ განავითარებს. ადამიანს ჭირდება, როგორც ფიზიკური ასევე სულიერი საზრდო.“
ბაზალეთის სასოფლო ბიბლიოთეკის გამგე, იზოლდა ჩიკვაიძე: „ჩვენი ბიბლიოთეკა საბიბლიოთეკო კვირეულს ღონისძიებით, „წიგნი და მკითხველი“გამოეხმაურა. მოსწავლეებმა სხვადასხვა მწერლის შემოქმედებიდან ლექსები წაიკითხეს. მიხარია, რომ მკითხველთა რაოდენობა ჩვენ ბიბლიოთეკაში თანდათან იზრდება.“
დეპუტატმა ვარლამ ჭიპაშვილმა მადლობა გადაუხადა აქტიურ მკითხველებს და მათ სიგელები და საჩუქრები გადასცა.